Manipur nung Home Guards-i longkak ait

Imphal, June 23 (Agencies): Manipur nung Home Guard tem itasen aser increment tem dak sendakba nung March 11, 2015 nü Supreme Court-i tetuyuba agütsüba ama mesüi state sorkari maparen kanga atsüdaka mezülongi inyakba anema tanü nungi tenzüka mapang telatet ka makai longkak aitba sentong ka Home Guard tem-i tenzükogo.
Manipur Home Guards’ Welfare Organisation (MHGWO)-i state sorkar dang SC-i 2015 March 11 nü tetuyuba agütsüba mapa küma inyaktsü asoshi khangogo. Supreme Court tetuyuba nungji ashiba agi, State sorkartemi home guards indang duty allowance rates ji police constable ka minimum monthly pay den kasa asütsüla.
Iba tetuyuba ya ita asem tsüngda nung mapa küm inyaktsü asoshi metetdaktsü. Iba dak sendakba nung Manipur High court-ia taküm January 12 nü ita asem tsüngda SC-i tetuyuba agütsüba mapa küma inyaktsü asoshi Manipur sorkar nem tetuyuba agütsüogo.
Ajisüaka Manipur sorkari tang tashi okadak nungi tetuyuba agütsüba mapa küma meinyaker ta Home Guard züngsemtemi ashi. Manipur Home Guard Employees Welfare Association (MHGEWA) lenisüba kübok mapang telatetka makai parnok tanü nungi mapai maor.
Home guard association-i SC tetuyuba mapa küma inyakdaktsütsü asoshi 2015 April 1 nü nungi tenzüka ajungshiyonga arudar.
Iba longkak aitba maparen tenzükba sayua home guard temi Imphal yimti süa rally ka ayongzüka akaba sülen Imphal Keishampat Junction nung mener longkak ait.
Iba rally ya Lamphel nung Home Guard headquarters nungi tenzük aser Keishampat Junction nung tembang, kong parnoki mener longkak aita liasü.
Parnoki iba sentong nung placard nung oren balala zülur sayua liasü.
Longkak aitba tesem nung osangbenertem den jembidang Manipur Home Guard Employees Welfare Association general secretary, Kh Inaobi Devi-i ashiba agi, state sorkari parnok takhangba mataloktsüra home guard temi longkak aitba yimya balala nung longkak aittsü.
Tang Manipur nung Home Guards 2158 lir.