NSCN/GPRN-i 4 lane lenmang atema jangjashitsür

Dimapur, June 23 (TYO): Nagalim nung terenlok mapa inyakbatem ajak Naga nunger ajangzüktsü atema jungjunga inyakdaktsütsü tangatetba nung NSCN/GPRN-i mapa inyakba ajak mita repranger aser iba nungji Dimapur aser Kohima tsüngda 4 Lane Road dena lir, ta MIP sangdong ka nung metetdaktsü.
Mapang shia, NSCN-i ECI aser Maytas Gayatri dang mapa jungjunga inyaktsü aser mapang lateta aliba tsüngda mapa tembangtsü atema nenshia metetdakja arur. Tang teinyakdak mapa nunga local aayangertem aser mapa inyakertem nem inyakdakjang ta parnok nem tetuyuba agütsüogo, ta MIP-isa ashi.
June 16, 2017 nü 4 lane mapa inyakba anenogo ta osang angazük aser iba jagi NSCN/GPRN ketdangsertemi Engineer tem dang kechiba mapa meinyaker ta asüngdang. Idangji parnoki tzünglu aruba ajanga mapa inyakba anen ta langzüa liasü, ta MIP sangdong nung shia lir.
Ajisüaka, June 17, 2017 nü social media aser print media nung mapa anenbaji NSCN-i timtem agütsüba ajanga lir ta osang prokshitsü tenzük. ACAUT aser KK Sema o Joel Rengma nungertemi NSCN dak tai tongloktsü aser Nagaland Angh, Padmanabhaiah B. Acharya-ia Delhi tashi oa Union Home Minister, Rajnath Singh den iba onük lemsatep. Yamaji lia, ACAUT-i NSCN/GPRN nem anogo asemnü tsüngda telangzüba agütsütsü atema mapang züngzüktsü, ta parnokisa metetdaktsü.
Iba atema NSCN-i NCSU den osang agitep aser iba mapang parnok sasep nung “communication gap” ajanga iba onük adok aser tasüngji osangkakettem nung jangjashitsütsü ta ashi. Ajisüaka, NCSU-i ashiba tasüngji maru aser Media o Social Media tem nung NSCN/GPRN dak tai tongloktsüba manen, ta MIP-isa metetdaktsü.
Tatem nung June 21, 2017 nü Kilo Kilonser, Hukavi Yepthomi-i NCSU tir Pele jaok aser asüngdangya asüdang, Pele-i pa indang works Supervisor inyaktsü atema Unification Camp (GPRN/NSCN) nung Deputy Kilonser, Neibu Angami nübo amshir ta nangzük.
NSCN/GPRN dak tiyazü nung tai tongloktsüba atema pai media tem dang osang jangjashitsütsü ta ashi, saka NCSU-i June 23, 2017 adok osangkakettem nung June 22 nungi mapa inyaktsü atema tenangzükba agitep ta-ang osang adokbaji tesüngmangtsüka lir, ta MIP sangdong nungsa ashi.
Dimapur aser Kohima tsüngda 4 Lane lenmang yangluba mapa anenbaji NCSU sasep nung mangatettep aliba ajanga liasü. Anungji, public-i iba onük angatettsü aser tiyazü nung NSCN/GPRN dak tai metongloktsütsü atema mepishir, ta MIP sangdong nungsa metetdaktsüogo.