Shürho-o Solo tepsetba anema Kohima nung lungkak ait

June 23, 2017 nü Kohima nung asür Shurho-o Solo tepsetba anema lungkak aitba sentong agiba noksa nung angur. 

Dimapur, June 23 (TYO): Asür, Shürho-o Solo tepsetba nung temulung melemi, iba tatalokba tekaratiba nung bushisüngdangtsü atema takhangba agüja tanü Kohima nung nisung meyirjang aika adenshia longkak aitogo.
June 18, 2017 aonung asür Shürho-o Solo tasümangji Kisama nung Garo morung kima angu, ta osang angazüker.
Longkak aitba sentong ya Kohima Village kübok Tsütuonuomia Khel Council-i ayongzüka liasü, aser kin balalai iba sentong pusema state yimtiba nung T Khel ground nungi DC Office tashi longkak aita jaja.
Iba sülen Kohima DC nem tezüluba nung temepishiba onük ka agütsü, iba shidi nung T Khel Council-i, “June 18 aonung ozü züngsem aser Kuozhü (Ne Minister’s Hill) Kohima nung alir asür, Shurho-o Sebastian Solo tasümang Kisama nung angu, aser pa tenaba tabelen zübo keter liasü, aser ibaji alangba agi masü saka hadir kari yirutsüba südi ta onoki temulung melemi bilemer,” ta shia lir.
“Paji nisung kari tepsetba asütsü akok ta onoki mulung malemer,” ta parnokisa ashi.
Iba dak sendakba nung Khuzama Police Station nung ken o ka benoka lir, aser iba tatalokba bushisüngdangdar, ta osang angazüker.
Council-isa ashiba agi, iba aonungji Shürho-o den par medemer pezü party liasü, aser parnokji Neise-o Zashümo aser pa kinüngtsü Tanuo, Tseilie Zashümo aser Menuovi Zashümo nunger liasü, aser parnok ajak iba tesem nungji liasü.
Council-isa Deputy Commissioner dang police-i bushisüngdangba maparen tembanga ochi jungkai adokjang aser tekaraba nung aibelenerji puang, ta takhangba agütsü.
Ano külen Deputy Commissioner, Rajesh Soundararajan-ia asür kibong den mangyim tejashi lemsatepba den külemi administration aser police-i tekaratiba nung bushisüngdangtsü ta metetdaktsü.
Kohima SP, Vekhosa Chakhesang-ia council dang, temulung melemi alir ajak, talisa par medemer pezüji June 21 nungi ghonda 72 police ket nung lir, aser ochi jungkai adoktsü atema jungjunga bushisüngdangdar, ta metetdaktsü.