Hamirpur nung Himachal Olympic asaya tenzükogo

Hamirpur, June 23 (Agencies): Himachal Pradesh lipok otsü nung saisapong sentong tulutiba ‘Himachal Olympic’ Hokulbarnü nungi Hamirpur nung tenzükogo aser iba asayamong nung Himachal Pradesh kübok district 11 nungi asayartemi shilem agitar.
Iba sentong tulu ya Wrestler tejen, Master Chandgi Ram Ji’er jabaso aser International Wrestler, Jagdish Kaliraman-i lapoktsü.
Sultan film nung Jagdish Kaliraman ya Salman Khan indang coach amai shilem agia lir. Iba asayamong ya Himachal Pradesh Olympic Association (HPOA)-i ayongzük aser HPOA tir, Anurag Thakur, MP (Lok Sabha)-i asatetba sentong ka lir.
Athletes nung takok angurtem nem Kaliraman ajanga sempet agütsü. Himachal Olympic ya sentong tulu ka lir. Anurag Thakur-i iba sentong kanga junga atongtetogo, ta iba sentong nung jembidang Kaliraman-i ashi.
Linük nung yimden yimsüsürtemi Anurag Thakur dak nungi angazüktsü aika lir. Pai cricket nung kisüng masü saka saisapong ajunga atema kiojen teperi achayanga yanglutsüogo, ta Kaliraman-isa shisem.
Iba asayamong nung Hockey, Athletics, Boxing, Basketball, Judo, Kabaddi, Volleyball, Wrestling, Kho-Kho, Weight Lifting aser Shooting nung asayartemi tokteptsü. Iba asayamong ya inter-district format nung asayatsü aser International Olympic Games ama asayatsü.