Confederation Cup 2017 nung Sanchez-i otsü yanglu

Kazan, June 23 (Agencies): Brehostibarnü Confederation Cup nung Chile aser Germany tsüngda asayaba nung telok anaprong nungi goal kaka agütsü saka iba asaya nung Arsenal nungi asayar, Alexis Sanchez-i otsü tasen ka yanglutet. Iba asaya nung Chile telok nungi Sanchez-i goal ka agütsütetba ajanga par linük nungi international asaya nung goal timba agütsüteter kümogo.
Sanchez-i Chile tenüng nung asayaba nung Germany den asayadang agütsütetba ya densema goal 38 agütsütet.
“Chile nunger rongnung goal timba agütsüsang akümba ajanga ni kanga pelar, iba asayamong akoktsü ya onok nükjidong lir aser onoki akoktsü amai bilemer,” ta Sanchez-i asaya temer osangbener den jembidang ashi.
Iba asaya nung Germany telok nungi Lars Stindl-i goal ka agütsüteta telok ana tsüngda goal kasasa aküm.
Chile aser Germany tsüngda asayaba sülen Group B nung Chile ya temaba jenjang tongtetogo. Iba Group nung Chile aser Germany telok ya points pezü-zü lir saka goal agütsüba asadangba nung Chile temaba jenjang nung lir. Kasa group nung Australia aser Cameroon telok points asem-sem nung lir.
Deobarnü Germany aser Cameroon tsüngda Sochi nung asayatsü, aser Moscow nung Chile aser Australia asayatsü.