Kidambi Srikanth Australian Open Super Series final-i iogo

New Delhi June 24 (Agencies): Australian Open Super Series nung maneni kanga junga asayateta India nunger asayar Kidambi Srikanth final tongtetogo. Pai 21-10, 21-14 agi China nunger asayar fourth-seeded Shi Yuqi madak takok angu.
Iba final ya Srikanth atema final asembenbuba atonga asayatsüba lir. Pai Singapore Open nung tanabuba jenjang ngutete aser iba sülen taoba hopta Indonesia Open koka liasü. Pa ya India nunger asayar rongnungi final asem tashi atonga asayar rognung mezüngbuba lir.
Srikanth-i Singapore Open nunga Yuqi kokatokogo aser tan asaya nunga pai minute 40 agia iba asaya akok.
“Ni World Super Series final (Singapore Open) ka küm anabuba nunga ang asayar asü aser iba sülen atonga final asayatsüba ya pungmang ka lir. Asaya peyong ni pa nem point mela melaa magütsü,” ta Srikanth-i ashi.
Srikanth final nung Olympic champion Chen Long den asayatsü shibai Lee Hyun II 26-24, 15-21, 21-17 agi koka liasü.
“Ni final asayatsüba atema kecha tebilemba mali aser akoktsüba makoktsüba atema kecha arendaka mali.Ni Chen Long den pezüben ponguben kabo asayaogo aser asaya timba ka terara agi danga pai akok. Ni pa den taküma anaben tashi asyaogo aser pai 21-19 ta ka agi koka liasü,” ta paisa ashi.