Temolung lemtetba

– Mrs. Meyisongla,Rtd. Deputy Director, Nursing Khm

Temolung lemtetba ya tetezü kanga tulu lir. Nisung kati tangar nisung ka dak tamang akaba. Tarendaktsü kecha mali. Molung masü kecha mali molung malem kecha mali (Worthiness of being relied on, confidence in the truth of anything). Tat: Aiür-asangur meimtepa nung molung toktepa medemer. Kinüngtsü aser kinüngbo tsüngda temeim nung tarak maket, anungji pelaa kibongji sünepa alir. Chirnur aser tsürabur tsüngda, pur medemer tsüngda, alima kin o kin na molung melemtep kecha mali yimjung nung sünepa aliba dang ajar. Kodang item rongnung molung melemtep adokdir, jashiteper, rarateper, tsükchiteper, yimjung mali, kati ka dak tenük meremer aser Ochi miima yur tembar tesendaktep raksar.
Lipok 18:15. Tsüngremi Abraham nungi kecha miima mayu-17, ni kechi inyaktsü ali iba indang Abraham dang miimdima ta Tsüngremi ashi. Abrahamji Tsüngrem molungdok tembar. Shibai Khuret bentettsü. (Hope and faith) Daniel 10:10 oh kanga temolung achiba Daniel, ni ne dang jembiba otem angang aser metongmetonga nokdakang kechiyong tang ni nü dangi yoka lir. Aser pai item jembidang ni atentena nokdak. Idangji pai kü dang ashi “Tetsübu Daniel”. Kechiyong tamasayongi Tsüngrem madang angatettsü asoshi nai nü molung nung jangraba aser ajemaluba mapang nungi nü sarasademba ni angashiogo. Daniel 9:22 Oh Daniel ! nü nem tashi temetet aser tangatetba agutsütsü ni arüa lir. Yamaji Tsüngremi Daniel dak temolung kanga toka aser temolung lemteta liasü. Daniel molungsongzü kangla nungi tematiba chuba yimli nung tongtipur akum. Küm aika tejaklen nungi, Tsüngrem temeimteba ajaso ka asotsü shin, saka matalok. Ajemaluba tsür Mary kanga ochishia aser la takum asüngteta ayu. Aji Tsüngremi ngua (Luk 1:27) la dangi Tsüngremi tenyar Gabrielji yok. Aser Aiürla tenüngji Mary liasü. “Pelaa liang, na taochi kanga angula, Kibuba nü den lir” 30, Tetsübuma Mary, kechiaser Tsüngrem nungi nai taochi nguogo 31. Na mashisa akumtsü aser tanur ka asotsü aser nai pa tenüng Yisü ta ajatsü. 32 pa tulu alitsü aser pa dang Tematiba meyong chir ta ajatsü. Yamaji Tsüngremi temolung lemtetba nem angati temoatsü agütsür aser ajungketsür Lipok 6:9- Noa tai maket ochishir nisung ka liasü pai Tsüngrem den jaja. Tsüngremi Noa dang ashi “Meimchir ajak tatem küma meshimeshia samatsütsü ni lemtetogo. Kechiaser parnoki alimaji azü tokshiba agi süngdaktsüogo. Tsüngremi Noa dak temolung lemteta par kibong, meshia alirtem, shiruru ajak atema Rong tuluka Gofer süng agi yanglutsü mapa nongloktsü.(Responsibelity) Noa-i iba rong kanga meranga aser taremzük agi küm 120 agia yanglu. Tsüngremi alima nung meimchir ajak tzümetsüng agi samatsü, saka Par kibongbo iba rong ajanga kümzük.
Tebu kati par jabaso dak kanga temolung lemtet nung par indang lim tuluka min tulu wazüka alidak arem shiruru jenti liasü. Iba min jagi shikarir kanga arur. Anungji pai min aser shiruruji wazüka kümzüka ayütsü meji nung Gate tajung ka yanglu. Anungji pai iba gateji anüktsü pai molung lemteta aliba jabasoji yok. Kobi melie shikarir telok ka kor rongdong nung mener par ti (8) arur gateji lapokjang ta ashi. Saka Asangur jagi melapoktsü. Idangji parnok rongnung tanishisang jagi tanübosang dangji yamai asüngdang. Nai ni shibaar meteter ma? Masü ni na shibar memetet ta langzü. Ni Duke of Willington ta ashi. Saka tanubosangi yamai langzü. Nibo aji mamanger. Willington yimti nung Chuba kati tebui (father) ashiba o tanga ta kodasür ashitsü ta langzü. Idangji Chubaji tejak meküm aser meyiper pa sülen anidakertem dang odi arung ta shir meyipa ao. Iba tebur chanu tilaka tsüngdang ni kanga maksü nguogo. Pa nungi kü takum tepeyong agitsü lesson tulu angazükogo. Ochishir aser temolung lemtetba tanur ka tebu kati ashiba anga mapa temolung agüja inyakdang Willingdon Chuba ka akok, aser iba lesson alima rangpen nung pa nungi lesson tulu agir. Pa dakji Tsüngremia temolung lemtettsü aser temoatsü agütsütsü. Tsüraburia pei jabasotem rongnung shiba dak temolung lemtetter pa nemji alima senmang aser kodaker senmang agütsür, Yacober jabaso tambosang Reuben, Simeon, Levi, Dan, Gad aser Benjamin dak tebui temolung melemtetji parnokbo atakatem senmang dang lemzüktsü.
Saka Yehuda, Zebulun, Asher, Naftali, Yosef parnok dak tebu Yacobi, temolung lemtet. Parnoki temoatsü senmang lemzük. Mat 25:21-23.
Pa kiburi pa dang ashi Lanliah, tajung aser temolung lemtetba kilir, oset ishika madak nu dak temolung lemteta liasü. Ni na oset aika madak Yutsüdi na kü kibur tepela daki yiang. Aser mori ka agizükbai arüa ashi. Kibuba na tedokdak nisung aser kong nai maten angji arüher aser kong nai meperok angji nai bendener ta ni metet aser ni tsübüa liasü aser oagi nü mori ali nung miima ayü. Ajiang nü meyong kechi, aji nai angur. Saka pa kiburi pa dang ashi tamajung aser azü mesen kilir ni kechi nung maten yangji arur aser kechi nung meperok yangji bendener ta nai metet. Anungji nenoki pa nungi mori bener oang mori ter akaba nem agujang kechiaser pa jenti akatsü saka shiba maka pa kechi aka ajiah pa nungi bener aotsü. Aser nenok tagidak maka kilirji kimalen tammang dak enokjang yangji tajepba aser tebu shitepba alitsü. Api shin 21:1 Chuba molungjangji ayongnü tzü ama kibuba ket nung lir. Pai koleni molung ilen jagi aji menepdaktsür. Nisunger lenmang shiaji pei nükdangbo shidak lir. Saka Kibubai temolung odanger. Mat 26:50 Yisüi Yehuda dak temolung malem Yehudai ashikülak jakla agi Yisü dak tepang mesepa alidang puti-üngertemi Yisüji püa alen. Puti-üngeri pa nem tatsük 30 agutsü. Kenü anogo tembar ana aieni ao. Ajungbena shirem tuluka arua tena rongnong ka yakta süngdongi atu. Kabo mejentetji ali nung tasü ama ondaka ali. Idangji shiremji arüa menemdanger tasü südi ta sür oa adok. Idangji shiba süngdong nung soa tua ali pai pa temba anasa arur tera menüja yamai asüngdang. Temba shirem to agi nü narong nung anguoker kechisa shir ao? Temdem nung doktsür jena aoba tembar den temedem ta shir ao ta langzü. Temolung melemtetba tembari yamaji inyaker. Asen Tsüngremi asen daka Temolung lemteta lir ma?