Nepal-i aotsü atema Aadhaar menüngdaktsü: Home Ministry

New Delhi, June 25 (Agencies): Nepal aser Bhutan-i aotsüpur India nunger atema Aadhaar menüngdaktsü, ta tanü Union home ministry-i metetdaktsü.
India nunger Nepal aser Bhutan-i aotsü atema aadhaar menüngdaktsü, kechiyong linük anapronglai visa menüngdaker. India nunger ket nung national passport mesüra Election Commission-i agütsüba election ID card lira iba jagi teperi, ta ministry-isa metetdaktsü.
Ano arishi küm 65 dak tema aser arishi küm 15 dang tekübok India nungeri parnok arishi küm indang kulikaket den ID sayura iba jagi teperi. Iba nungji PAN card, driving licence, Central Government Health Service (CGHS) card aser ration card densema lir, ta Ministry-isa metetdaktsü.
“Nepal/Bhutan-i aotsü atema Aadhaar (UID) card magizüktsü,” ta Ministry sangdong ka nung metetdaktsü.
Unique identification number züngdangba 12 aliba Aadhaar card nung ya nisung ka talidak aser tenüng densema nija osangtem lir.
Bhutan-i gari lenmang ajanga aoer India nungeri Phuentsholing nung Bhutan sorkar immigration office dang kulikaket sayua ‘Entry Permit’ meshitsüla.
ID tejangja dang sayura Nepal-i aitsü arrtsüji India nunger atema lapoka dang lir.