China anentsüh nungi tasümang 15 agitetogo

Beijing, June 25 (Agencies): China Sichuan Province nung anentsüh alua nisung aser kiojen aika raksatsüba nung tekümzüker noklang aikati kanga meranga inyakdar aser parnoki tasümang 15 bo ngutetogo aser ano 118 monguteti lir, ta rescue headquarters nungi metetdaktsü.
Nisungtem bushia kümzüktsü asoshi aonung sangwaa inyakdar aser maneni iba dak sendaka tang lendong adoktsü ali asü maliar asadangtsü asoshi nisung yokogo.
Iba tesem nung ‘Geological expert’ temi ashiba agi, anentsüh nung rema alirtem taküm ngutettsüji kanga bo tiemla mali.
Tekümzükertemi azü aser life detector amshia iba tesem nung nisungtem bushidar, saka nisung taküm aliba temaitsü kecha mangu.
Tibetan Deputy governor aser Aba, Qiang Autonomous Prefecture, Xu Zhiwen-i ashiba agi, samar alirtem indang osang tejangja sorkar website nung yakda adoktsütsü.
Raliwalirtem iba anentsüh nung anenbanger alitsü ta shisabulua aliba Xu-i jangjatsüogo; Raliwalirtem parnok 142 iba tesemi Hokolbar nü aiertem ajaka kümzüka lir. Iba tesem ya raliwalirtem mongchen lir.
Aba prefecture nung tenem nung anentsüh aluba ajanga Maoxian County kübok Xinmo yimtsüng Honibar anepdang 6:00 ako shi nung anenbang aser iba ajanga ayong km 2 shi aser lenmang meter 1,600 anenbanga lir.
Provincial sorkari iba tesemi tekümzükertem aika yokogo aser tang tashi nung life-detection instrument balala bener parnok 3,000 dak tali-i mapa inyakdar. Ketdangsertemi ashiba agi, iba anentsüh ya tzünglu kanga sashia aruba ajanga alu. Parnoki asadangba nung ngutetba agi, ali cubic meters million 18 shi meter 1,600 shi alua Xinmo yimtsüng tesadang ka anenbang.
Anentsüh alur ghonda 5 shi lir kibong ka nungi dang parnok 3 kümzüktet. Parnok Maoxian County People’s Hospital anir ao aser kata tasütsüsa bo yirua mali. Ajisüaka par kibong nungi sa arishi küm 3 tain tanur ka anenbanga lir.
Maneni osang ajanga ashiba iba yimtsüng nungi tesem tanga nung alir parnok lendong nungi jenbua lidaktsütsü asoshi Honibar aonung school kati belener ogo. Iba yimtsüng tang aliba tesem ya 1976 küm melenshia lidaktsüba tesem ka lir kechiyong iba tesem ya anentsüh teti aluba tesem ka lir.