BS&G Mokokchung plastic amshi anener

Mokokchung, June 25 : Janaona, tongtibangsa plastics ajanga alima menentsüba tekümdangtsü osang sangokja aser iba nungi pilaa alitsü ayongzüka, Bharat Scouts & Guides (BS&G) Mokokchung ajanga Honibarnü Imkongmeren Sports Complex tesem merükmejua mungogo.
Merükmeju sentong nung District Youth Resource Officer, Mokokchung aser District Commissioner, BS&G Libimo Lotha-i plastics ajanga alima libuküm menentsüba tebilemtsü lemsatepa ‘plastics amshiba anentsü’ ayongzük.
BS&G Golden Jubilee nüngtem ayongba merükmeju sentong nung SDEO & Dist. Secretary, BS&G R. Asenla, DOC Scouts & Guides aser School pungo – Mayangnokcha Gov’t Higher Secondary School, Queen Mary Higher Secondary School, Gov’t Town Middle School, GMS Pongentola aser GMS Imrong Ungma nungi scouts aser guides den tesayurtem aser Scouts aser Guides senior tanishirtemi shilem agia liasü.