Costa melentsü tasak asütsü: Lampard

June 25, 2017 (Agencies): Taoba mapang Chelsea nungi asayaa alisang Frank Lampard-i ashiba agi, Premier League champions Chelsea puri tawa transfer window nung Diego Costa jiokadokra pa melentsü asoshi tasak asütsü.
Arishi küm 28 tain Costa ya Chelsea nung 2014 küm arua aden aser season asem tashi nung par telok nungi goal timtiba agütsüsang lir aser pa dena shilem agiba nung league title ana tashi kokogo.
Iba ita tetenzüklen manager Antonio Conte-i iba club tarutsü sentong nung pa shilem mali ta ashiba sülen Spain international team nung asayasang yagi pa Stamford Bridge toktsütsü ta ashi.
“Pa kanga dang striker tajung ka lir aser asenoki taoba season aser pa iba club nung adenba mapang nungi ngua arudar. Pa melentsü asoshi kanga tasak asütsü,” ta Lampard-i ashi.
Taoba season nung Costa-i 42 ben asayaba nung goal 22 agüja liasü saka Chelsea pur Everton striker Romelu Lukaku shibai taoba season nung goal 26 agüja liasü, pa tanaben alitsü asoshi sentong yangludar.
“Lukaku Chelsea 2014 küm toktsüba sülen kanga junga kümogo aser club asoshi Romelu ya tajung asütsü,” ta Lampard-i ashi.
Costa-i ashiba agi, pa Atletico Madrid-i meyipa onür saka Atletico pur January 2018 tashi asayar tasen malitettsü, kechiyong parnok Court of Arbitration for Sport (CAS)-i asayar alizüktsüba nokdanga lir.