Srikanth-i Australian Open Super Series kokogo

Sydney, June 25 (Agencies): Kidambi Srikanth-i hopta asem tsüngda nung asayamong tanabuba kokogo. Pai Australian Open Super Series final nung 22-20, 21-16 agi Olympic Champion Chen Long madak takok nguogo.
Pai asaya tetenzük nungi kanga junga asayaa tenzük aser mezüngbuba set tom tashi nung pai 11-9 agi Chen Long jakdang liasü, ajisüaka Chen Long-i pa Olympic gold medalist ta sayua point 14-14 ta arishia atu. Asayar anapronglai kanga meranga asayar mezüng set tie breaker asayatsü sa aküm aser Srikanth 22-20 agi iba set akok.
Tanabuba set nung Srikanth-i pa asaya jenjang tajungba kati ajungketa kanga tokteba asaya aser pai 21-16 agi iba set koka asayamong dena koktet.
Iba takok densema pai tang tashi nung Super Series 4 kokogo.
Srikanth takok dak sendakba nung Mahindra Group Chairman, Anand Mahindra-i tanü pai pasasa Srikanth nem Australian Open Super Series akokba atema TUV300 gari ka agütsütsü nangzükogo.
Maneni Badminton Association of India-i iba takok atema Srikanth nem sen lakh 5 agütsütsü nangzükogo.
Arishi küm 24 tain asayar yangi maneni kanga junga asayateta India nunger badminton asayar teburtem rongnungi Superseries title pezü akoker mezüngbuba kümogo. Pai India nunger rongnungi mezüngbuba superseries pezü akokba dang masü saka superseries asem tashi nung final atonga tongteter rongnung alima nung asaya trok buba kümogo.
Australian Open Superseries nung Srikanth dak alaka tanga India nunger asayar Sai Praneeth, P V Sindhu aser Saina Nehwal nungeri dena quarterfinals tongteta kanga junga asayaogo.