Arunachal sorkar mapa inyakertem mapang atsülangtsür

Itanagar, June 25 (Agencies): Arunachal Pradesh state sorkar mapa inyakertem arishi küm 58 nung mapa nungi anisüngzükbaji sangküm nungibo arishi küm 60 tashi asütsü atema Deobarnü sorkari telemtetba agi.
“Sorkar mapa inyakertem karbo arishi küm 60 tashi inyakba sülen ang mapa nungi anisüngzüker aser ibaji sorkari süoki bilem” ta Chief Minister, Pema Khandu-i ashi.
Ita ishika state sorkari iba onük atema reprangshima aru aser cabinet nunga anaben tashi benoka jembiogo, ta paisa ashi.
Sorkar mapa inyakertem mapa nungi anisüngzükba nung telemsa malitsü atema sorkari arishi küm 58 nungi 60 ajungkettsü atema telemtetba agi, ta Khandu-i osangbener dang ashi.
Ajisüaka, iba inyakyimji January 1, 2018 nungiang tenzüktsü, kechiyong iba dak sendakba teinyaktsü aika lir, ta paisa metetdaktsü.