India nunger Facebook follower jenjang tanabuba nung Kohli lir

Mumbai, June 26 (Agencies): India nung social network platform, Facebook nung India nunger rongnungi timba ‘follow’ asür timtiba rongnung cricket asayar Virat Kohli-i tanabuba jenjang Deobarnü tongtetogo aser pai Bollywood actor Salman Khan ajatetogo.
Facebook nung Kholi sülen anidaker 35,434,956 mesüra million 35 lir aser Salman Khan sülen Facebook nung anidaker dang nungi 6,00,000 agi Kohli timba lir. India nunger rongnungi Facebook nung ‘follow’ aser rongnung temaba jenjang nung Ato Kelonser, Narendra Modi lir, pa sülen Facebook nung ‘follow’ million 42.2 lir.
India nunger tebur cricket asayar captain, Virat Kohli sülen anidaker ya Twitter nung million 16 aser Instagram nung million 14 lir.
Kohli ya International Cricket Council (ICC) indang One Day International (ODI) aser T20I ranking nunga temaba jenjang nung lir aser ODI nung runs 8,000 ajunger rongnung tawa pa tekeratiba kümoko. Pai Innings 175 nung iba otsü yanglutet.
June ita tetenzüklen Forbes ajanga ‘2017 World’s highest paid athletes’ sangdongba nung Virat Kohli ya jenjang 89buba nung lir aser pa indang rongsen ya million $22 lir. Taoba küm ESPN World Fame 100 sangdong nung Kohli ya jenjang 13buba nung liasü.