May’er sorkar yaritsü asoshi DUP-i molungogo

London, June 26 (Agencies): Democratic Unionist Party (DUP) ajanga Conservatives party yaria Britain nung Theresa May indang sorkar arudaktsütsü asoshi molungtetogo.
Hopta ana tejaklen Britain election osang sangdongba nung telok katia sorkar kümtettsüsa takok mongutetba sülen DUP telok nungi Parliament züngsem ter-i Conservatives party busemtsü tezüngzüktep agi.
DUP-i Conservatives party busemba ajanga taruba küm ana asoshi Northern Ireland nem sen billion £1 tali agütsütsü.
Iba tezüngzüktep ya Northern Ireland aser United Kingdom asoshi tajung, ta DUP lenir, Arlene Foster-i ashi saka iba sentong ya sen agi alizükba dang lir, ta nisung aikati aitsür.
Iba tezüngzüktep ya linük ajungtsü asoshi masü, ta Labour party nung lenir, Jeremy Corbyn-ia ashi.
Iba tezüngzüktep ajanga Wales aser Scotland nung nüburtem ajangzüktsü asoshi senotsü agütsüba kasa kümdaktsütsü, ta ashir.
Telok ana tsüngta tezüngzüktep agiba zülubanglu ya tapak asem lir aser iba zülubanglu ya ajunga temai adoka sayuogo.
Northern Ireland nung kiojen, health aser education nung taruba küm ana tsüngta indoktsü asoshi sen billion £1.5 agütsütsü aser iba sen ya taoba mapang sangdonga aliba sen million £500 aser tang tezüngzüktep nung aliba sen billion £1 alitsü.
Northern Ireland nung aliba mitkar mapa nungi anener alirtem nem teyari tajungba agütsütsü, state pension nung küm shia shilem 2.5 ajungkettsütsü aser UK ajunga nung ‘winter fuel payment’ agütsütsü atema iba tezüngzüktep nung inoka lir.
Iba den külemi kasa tezüngzüktep ajanga Brexit aser temzüng ajunga nung DUP-i Tories/Conservatives telok yaritsü.
NATO-i raraba nung indokba sen shilem ana UK-i agütsütsü, taruba election matong tashi aluyimer nem senotsü teyari tang ama agütsütsü, Good Friday Agreement nung aliba ama telok anaprong-i inyaktsü aser nüburtem den memolungtepi Ireland arrtsülen election magitsü amala tezüngzüktep densema agi.
“Iba tezüngzüktep ajanga UK nung nüburtemi aginüba ama mapang shidak nung sorkar tajung arutsü,” ta DUP lenir, Arlene Foster-i Downing Street kima osangbener den jembidang ashi.