Tang mezüngbuba Kohima nung ‘Theatre Play’ agi

Kohima, June 26 (TYO): Hombar nikongdang RCEMPA, Jotsma nung Earth Movers-i ayongzüka tang mezüng ‘Theatre Play’ kaogo, aser iba nungji saya asem aser advertisements ajanga local products ajungketja liasü.
Mezüngbuba saya ‘The Last Attempt’ ajanga tanü putu nung lanurtemi timtem ajuruba aser anüdoklen sobaliba benshiba indang sayur.
Iba saya ajangasa, tang nisungtem tanu putu ainba tenüng amer teshisadangba makai anüdoklen sobaliba benshiba ajanga anüdoklen sobaliba aser tanü putu ‘modernisation’ na tsüngda mebendangtetba osang sangdonger.
Kasa saya ajanga tanü putu nung kiyimba tetezü ‘tanela ana longjemba’ junga mangateti kiyimba benjungji rongsen sayutepba sentong ka dang mesüka kümdaktsüba indang sayur.
”The Last Hope’ saya ajanga asen lokti nung tenüng agi dang Khristan ka taküm aliba indang sayur, kong tanü Khristantemi takar sobaliba benshiba, takartemi pei medemer aser kinünger tejak repranga inyakba aser nisungtemi rongsen arishiba indang sandonger.
Tetushi tejaoker o jembidang Art & Culture Deputy Director, Vilalhou Nousi-i, ‘theatre plays’ ya tang tasen süaka tawa kanga renloka kümdar, ta pelaba metetdaktsü.
Art ajanga aika ajungshitettsü aser loktiliba ajungkettsütettsü tashi lir, ta shia pai, asen lokti nung art indang tashiji rajemtsü kanga tongtibang, ta metetdaktsü.
Item sayaji fashion artist Cynthia Kolakhe-i direct asü, Muzung Yimchunger costume designer liasü aser Modern Institute of Teachers Education (MITE) nungi kaketshirtem artists liasü.