1buba Kohima District Inter-School tournament tenzükogo

Kohima, June 26 (TYO): Royal Club Kohima aser School Education Department-i ayongzükba mezüngbuba Kohima District Inter-School Football Tournament tanü nungi Kohima Local Ground nung tenzükogo.
Iba asayamong nung Kohima aser Tseminyu nungi ajak senteper school 24 shilem agidar aser asayatem knock out yimya nung asayatsü.
Asayamong lapokba sentong nung Minister for School Education Department and SCERT, Yitachu tongti tesemdanger liasü aser pai lanur asayartem nem iba amala maongka agütsüba atema asayaong ayonger tenüng asang.
Pai kaketshritem dang asaya nung dang tali temolung magütsüi kaket shisatsü bushiba nung mapang shidak amshitsü asoshi aser iba amala maongka ajanga parnok skill tem tali arangtetshitsü atema ajungshi.
RCK züngsem Thejao Vihienuo iba sentong lenir asü aser Leaders for Christ International, tir Dr Tseibu Rutsa-i sarasadema iba sentong tenzük. RCK tir Kevizatuo Miachieo-i lokti pelaa agizükba o jembi aser asayartem kulizüngtepba secretary Kepelhutuo Nakhro-i agi. Sentong nung temeja ken Dziesekhrienuo Keretsu aser Ksziah Mero & Kekhrie Thepa nungeri aten.
Asayamong nung takoker nem sen 70,000, tanabuba jenjang nung tembanger nem sen 50,000 aser semifinal nung tamakok anguba telok anaprongla nem sen 20,000 senpettem agütsütsü.
Asayamong tetenzük asaya nung North Field School nungi Ruokuonguzo-i minute 65buba nung goal ka agüja Vinyüzo School madak takok angu.
Asaya tanabuba nung Model Higher Secondary School-i 3-2 agi Mezhür HSS madak takok angu. Asaya nung mezüngbuba goal Mezhür HSS puri minute 34buba buba nung agütsü saka Onwang-i asaya shilem mezüngbuba matemdang goal ka agüja score kasa aküm.
Asaya tanabuba shilem nung Model HSS pur nungi Atong-i minute 52buba nung aser Onwang-i minute 58buba nung ta maneni goal ana agütsü. Mezhür HSS pur nungia Khriesa goal ka agütsü saka parnoki tasembuba goal meküptokteti Model Higher Secondary School-i iba asaya akok.
June 27 nü asayatem:
1. Bethel HSS vs St Peter School @ 1pm
2. TM Govt. HSS vs Khedi Baptist HSS @ 2:40pm