Modi-i US State Secy Rex Tillerson den ajurutep

Washington, June 26 (Agencies): Hombarnü India Prime Minister Narendra Modi-i US tir Donald Trump den majurudang US Secretary of State, Rex Tillerson den ajurutepa senden ka amen.
Modi anenzüka aliba Hotel Willard Intercontinental nung Tillerson-i pa den ajurutep aser tenati Indo-US tesentaktep indang onüktem kar lemsatep.
Tanü US Defence Secretary James Mattis-ia Modi den ajurutepa liasü.
Modi-i Washington semdangi maodang Tillerson-i iba ajanga Indo-US tesnetaktep akangshitsü aser kiralongraba anema raraba den rongsenkettsüng tsütsü terenlok angutsü ta metetdakja liasü.
Taoba hopta Tillerson-i Foreign Secretary S Jaishankar den ajurutepa senden amendang iba olen jembi.
“Prime Minister-i semdangba ajanga United States aser India tsüngda tesentaktep akangshitsü. Kiralongraba anema inyakba maparen, rongsenkettsüng jenjang aser Indo-Pacific region nung security maparen ajungkettsü ta Secretary-i ashi” ta State Department otongdari metetdaktsü.
PM Modi aser US tir Trump na White House nung aliba Oval Office nung Mongulbarnep 1:20 ako nung ajurutepa senden amentsü. Tena minute 20 amenba senden sülen White House indang Cabinet Room nung delegation-level olemtep alitsü.
Iba sülen Modi aser Trump nati Rose Garden-i aotsü aser media den külem sensaksem mapang agitsü.
Osangbener den sensaksemba sülen lennir anaprong den linük anaprong nungi teshimtet teloktemi State Floor nung Vice President Mike Pence-i ayongba cocktail reception nung shilem agitsü.