DCC Dimapur-i SIT ajanga Excise dept. nung bushisüngdang asütsü akhanger

Dimapur, June 26 (TYO): District Congress Committee (DCC) Dimapur-i Excise department nung nisung shimokba ken o Special Investigation Team (SIT) nem bushisüngdang südakjang ta takhangba agütsüogo.
RTI ajanga Excise department nung 2015-17 tsüngda mapa inyaker nisung 21 ‘directly’ mesüra ‘back door’ ajanga shim ta metetdakja lir.
Congress telokisa excise department nung mapa nungi anisüngzüker aliba ketdangsertemi sorkar garitem amshiba inyakyim SIT nem bushisüngdang asütsü atema takhangba agütsü.
Excise department nung RTI ji taoba Highway Area Sumi Students Union tir, Vikato S. Aye-i agütsü, ta DCC Dimapur president, Kughato S. Aye-i Hombarnü osangbener den sensaksemdang ashi.
Excise department nung 2015-16 tsüngda nisung 21 shimokba rongnung asembo ‘compassionate ground’ nungi liasü aser parnok rongnung AIE 1, LDA 2, head constable 3, constable 11, steno 1, driver 1 aser peon 2 lir.
RTI telangzüba nungsa 2015 nungi Assistant Inspector Excise (AIE) jenjang aser teküpbok nung sorkar mapa nungi anisüngzükertem shia lir.
2016-17 tsüngda Excise department nung nisung 40 tashi mapa nungi anisüngzük aser parnok rongnung AIE 4, head constables 30 aser constables 6 liasü, saka parnoki toktsüba menden atema nisung meshimi lir. Mapa tazüngtem atema department-i advertisement atema maparen inyakdar ta RTI nung telangzüba agüja lir.
RTI telangzüba dak alia Excise department nung mapa tazüng 35 lir. Itemji LDA-cum computer 4, head constables 4, constables 25 aser peons 2 lir, ta DCC Dimapur tirsa ashi.
Item onüktem nung ajemdaker DCC-i NPSC kübok aliba aser tanga mapa tazüngtem atema advertisement agütsütsüla aser ‘open competitive examinations’ ajanga nübotem shimoktsüla, ta takhangba agütsü.