Mozü achiba anema inyakba mapa nung MLA tem ajak adentsüla: Dr. Nicky

Kohima, June 26 (TYO): Ozüngi nokdangba mozütem achiba aser shibelenba anema inyakba mapa nung Nagaland nung yimsüsür ajaki shilem agitsüla ta MLA Dr Niekiesalie Nicky Kire-i ashi.
Hotel Japfu nung International Day against Drug Abuse sentong nung tongti tesemdanger ama shilem agia o jembidang, Dr Nicky-i sentong ayongertem aser NGO tem dang MLA ajak iba ama sentong nung jaoktsü ayongzük.
Kati ka dak tai metongloktsütepi, yimsüsürtem ajak iba tebilemtsü atema mapa inyaktsü atema shilem agidaktsütsüla. NGO temi sorkar dak tai metongloktsütsüla saka amalitepa mozü achiba khuret koktettsü atema külemi mapa inyaktsüla, ta paisa ashi.
Nagaland kübok district ajak nung detox aser drug treatment centre lapoktsü atema sorkari yaritsü, ta Dr. Nicky-isa shisem.
Nagaland nung yi nokdangba indang onük atema jembidang, “yi nokdanga liaka, yi ajemertemi maneni ajemtsü aser yi nokdangbaji agienaka, majemertemibo majemtsü” ta paisa ashi.
Asen state nung yi nokdangaka, jenjang tasak agi yi tamajung angur. Iba ajanga saru tsütsü takoksa anguba dang masü saka nija, kibong aser loktiliba atema takoksa angur, ta Dr. Nicky-isa metetdaktsü.
Sentong nung NSMDC Parliamentary Secretary, Vikho-o Yhoshü-i yi ajemba toktsüba indang kuli lemsatep.
“Nisung shingaia ‘addict’ akümtsü tebilemba nung yi ajemtsü mesüra mozü achitsü metenzüker. Asenoki yi aser mozü nung lendong aketba osang metetdaktsütsüla aser awareness den anepalu shitak süra, mozü mesüra yi ajemba yimya endoktettsü” ta Vikho-isa ashi.
Sentong nung mendenji Nagaland State Legal Services Authority Coordinator, Akumla Longchari liasü, KABA Associate Pastor (Youth) Tiatoshi-i temoatsü meshia sarasadem, Ketho Angami-i okila jembi aser OSD Social Welare Kewe-u Kenye-i anküp tepela o jembi.