GST tenzükba sentong nung madentsü: Mamata

Kolkata, June 28 (Agencies): Tanü Trinamool Congress lenir aser West Bengal Chief Minister, Mamata Banerjee-i, June 30 ayaterm nung GST tenzükba sentong nung lar party bo madentsü, kechiyong iba ya nüngdak makaba nung aritepa inyakba mapa ka lir, ta metetdaktsü.
Mamata-i ashiba agi, GST ya Centre-i aibelena inyakba rongnung ka lir.
“June 30, 2017 ayaterm nung Parliament House nung GST atema benjungba sentong nung madentsü asoshi Parliamentary Party-i lemtetogo, iba ya GST anema longkak aitba ka lir,” ta lai ashi.
“Onoki GST atema kanga shisabulua bilemer. Demonetisation sülen ano tang nüngdak makai aritepa inyakba mapa ya Centre-i aibelenba rongnung ka lir,” ta lai Facebook ajanga ashi.
“Tetenzük nungi onoki GST pusema liasü saka Centre sorkari iba ya aritepa inyakba agi onok shisabulur,” ta lai ashi.
“GST mapa küma benoktsü atema ano khenpia atasatsü asoshi onoki aiben benokogo, saka parnoki manga. Shishilembartem, talisa tilateri shishilembartemi tsübur aser ratamatar,” ta laisa ashi.
BJP aija lai, “Tang Centre sorkar tashi nung aliba party-i küm 7 dak tali GST anema nokdak, aser par yimsüsüba aruba sülenbo parnoki tenüng agia GST benoker,” ta ashi.
“GST ozüng aser temzüngtem ajak rajemtsü atema ano ita trokbo nüngdaka liasü, aser iba ya benoktsü atema stakeholders, talisa small & medium enterprises nem mapang tali agütsütsüla asü, ta onoki bilemer. Ajimesüra linük nung tensa mejungi akumtsü, aser iba khuretji India sorkari abentsü,” ta Mamata-i ashi.
Nüburtem aser shishilembartemi ola adokbaji Centre-i angashitsü imlar, ta laisa shisem.