Political jenjang nung Mizoram sorkar aser HPC na jembishinütsü

Aizawl, June 28 (Agencies): Mizoram sorkar aser Hmar People’s Convention (Democratic) na tsüngda yimjung ken o July nung jembishinütsü aliba ya, tang ketdangsertem jenjang nung dang jembishinüa aliba ya political jenjang-i ajungketa jembitsü akok, ta Home Department ketdangsertemi Hombarnü metetdaktsü.
Ketdangseri ashiba agi, taoba küm August 10 nü yimjung ken o pezüben buba tangatettep nung jembishinüogo aser Hmar nunger dak sendakba nung mangatettep aliba telemtetba tajung ka agitsü asoshi kanga keraa maparen inyaka odar.
Tang tejembidak ken o ya Sinlung Hills Development Council (SHDC) nem tashi agütsütsüba aser inyakyim benoktsütsüba dak sendakba nung jembishinüa arudar aser SHDC ya Sinlung Hills Council (SHC) ta nüngja melentsü akok. HPC (D) telungpurtem parnok prangbongtem bener bendanga agüja temai adokba sülen parnok asoshi senotsü teyari aser talitsü tesemtem agütsütsü asoshi state Finance department-i molunga agizükogo.
HPC (D) puri taoba mapang nung Mizoram kübok Manipur arrtsü len north eastern tesem nungi agiteta autonomous district council balaka kümtettsütsü asoshi khanga liasü. HSP (D) telok yagi 1994 küm HPC telungpur aser sorkar na tsüngda kulizüngtepba SHDC kümtetba magizükteti liasü. Tangatettep ka dangi arur HPC telungpurtem bendanga agütsüba sülen parnok maneni telungi ai.