Assam nung tesayur ka apu

Guwahati, June 28 (Agencies): Assam nung Muslim nunger tesayur ka indang WhatsApp profile nung Ato kilonser Narendra Modi indang noksa mamshiyimi amshir aliba atema puogo.
Tesayur tenüng ya Abdul Hamid Barbhuiya ta jangjaogo aser police-i shiba agi, pa indang WhatsApp profile nung noksa ana liasü. Mezüngbuba noksa nung azü ka noksa nung Modi ja inoker “dutiful dog” ta caption agütsür liasü aser tanabuba noksa nung nisung temang ka nung Modi tejak inoker azü dak mamatzü yima yanglur lir.
“Pa contact temi iba noksa indang meteta liasü kechiyong parnoki pa indang DP nung iba ji reprangteta liasü. Onoki iba ya yashiang metet aser pa yasüng apu,” ta Hailakandi superintendent of police, Pranabjyoti Goswami-i osang benertem dang ashi.
“Pai mejangja asü kechiar onoki memetet. Section 66 A (b) IT Act aser Indian Penal Code Section 120 (B) kübok pa anema ken o ka benokogo. Pa Tanü (Bodhbarnü) okadak ka nung obendangtsü,” ta Goswami-i shisem.
Barbhuiya ya southern Assam’s Hailakandi district nung Janakicharan Higher Secondary School nung inyaker.
Iba nisungba apuba sülen opposition Congress party puri BJP pur aitsüogo.
“Indira Gandhi-i taküm tepiyong iba amala noksa nung la amshiba ajangsahi aruogo. Rahul Gandhi indang noksaa cartoon ama adoka mamshi na? Iba tesayur apuba ajanga BJP puri parnok sasa parnok dak taochi makaba sayur,” ta Congress otongdar Apurba Bhattacharya-i ashi.
State director general of police, Mukesh Sahay-i ashiba agi, iba noksa ya tebilemba tamajung nung amshiba süra pa aitsütsü.
“Iba amala maparen ya temaba jenjang nung aliba nisung ka tenüng menüktsütsü asoshi tebilemba nung inyakba süra aitsütsü,” ta Shay-i ashi.