Alder College, Kohima-i add-on music courses tenzüker

Kohima, June 28 (TYO): Bodhbarnü Alder College, Kohima den Symphony Academy of Music, Kohima senteper voice, violin aser dance atema ‘Add-on Courses’ tenzükogo, aser iba sentong nung tongti tesemdangerji, Project Director, Music Task Force, Gugs Chishi liasü.
Sentong nung jembidang Gugs Chishi-i, asen state nung music tsütsü sempet alir jenti lir, aser ano aika ajangzüktettsüsa lir, ta metetdaktsü.
Kentenmenüba luyimertem atema maongka balala aliba metetdaktsüdang Gugs-i, “Music süoki ia agirtem atemabo iba ya taküm lenmang ka aser sen aazüktsü lenmang ka lir; iba atema meranga aser nendaka inyaktsü nüngdaker,” ta ashi.
Chishi-isa, item add-on courses ajanga kaketshirtemi ano sempet tali arangshitsü imlar, ta ashi.
Paisa kaketshirtem dang item course ya tenüng agidangbo magitsüla, saka pei tejangraba ali nung ang agitsüla, ta metetdaktsü.
Iba sentong nung kaketshir 640 dena liasü aser Alder College Principal, Dr Rukhono K Iralu-ia kaketshirtem ayongzüka liasü.
Symphony Academy of Music Director, Mele Pucho-i tongmelang agi syllabus aser exams boards indang metetdakja liasü.
Symphony Academy of Music den sentepa inyakba mezüngbuba college ji 2016 küm Kros College, Kohima liasü.