MVD-i Road safety sentong ayonga kaogo

Dimapur, June 28 (TYO): June 27, 2017 nü IMC Hall, Dimapur nung Motor Vehicle Department (MVD)-i ayonga road safety awareness sentong ka kaogo, aser iba sentong nung Urban Development Department Advisor, S.I Jamir tongti tesemdanger liasü.
Iba sentong nung jembidang SI Jamir-i, Dimapur nung traffic tebilemtsü ya kanga tuluka lir, aser Dimapur yimti nung traffic ozüng amshitsüji senso ajak teinyaktsü kaka lir, ta metetdaktsü.
“Asenok senso tajung kaka kümdi aser alima dang Dimapur sensotem ya pei teinyaktsü metetba nüburtem lir ta sayudi,” ta paisa ayongzük.
Road safety atema inyaktsü asoshi ajaki nangzükra, gari lendong kanga ajema akümtsü, traffic ajungtsü, ta paisa shisem.
Sentong nungsa pai ketdangsüa lokti nem road safety tenangzükba agidakja liasü.
Okila jembidang Transport Commissioner Nagaland, Elias T. Lotha-i, Nagaland nung gari lendong kanga bulua kümdar, ta metetdaktsü.
Elias-isa, kümshia alima nung gari lendong nung nisung million 1.2 shi asür, aser asürtem rongnungjagi shilem 10 bo India nung atalokba lir, ta paisa ashi.
Gari lendong atalokbaji timbaka nisungi mekümdangba agi lir, ta shia Elias-i, gari anirtemi tangar atema mebilemtsüba aser civilian temi traffic ozüngtem mamshiba kulitem ajanga lendong ataloka nisung asür, ta metetdaktsü.
Commissioner of Police Dimapur, Limasunep Jamir, IPS-i lenmang nung gari lendongtem nokdangtetba onük aser Legal Aid Counsel & trainer NSLSA, Limasenla Longkumer-i road safety indang ozüng aser temzüngtem indang jembia liasü.
Iba sentong tenzüka Pastor NCRC, Sumi Purana Bazaar Rev. Dr. Shiwoto Assumi-i sarasadema liasü.
Iba sentong ya Ministry of Road Transport & Highways aser Association of State Road Transport Undertakings mapatong dak sendakba lir.