Netherlands Prime Minister-i Modi nem bicycle ka agütsü

New Delhi, June 28 (Agencies): Mongulbarnü Hague, Netherlands nung aliba Catshuis nung Prime Minister Narendra Modi-i Netherlands Prime Minister, Mark Rutte den ajurutepa senden ka amen.
Senden nung lennir ana tsüngda onük aika benoka olemtep aser linük ana tsüngda social security, water cooperation aser cultural cooperation atema MoU asem tashi agitepa liasü.
Yashi Mark Rutte-i Modi nem bicycle ka sempet agütsü aser iba indang noksaji tanü Modi-i Twitter nung sayuogo.
“Bicycle agütsüba atema kanga pelar PM Mark Rutte” ta Modi-i Twitter nung zülu.
Noksa nungji Modi-i bicycle anidang Mark Rutte-i menürema pa repranga ataba lir.
Netherlands nung nisungtemi cycle kanga sapua anishir aser parnok taküm libaliro nung kanga tongtipang lir. Holland website nung ashiba agi, Netherlands nung bicycle million 18 shi lir saka nütsüng yongsükbo million 16 dang lir.
PM Rutte office-i arudang bicycle nung mener arur aser Netherlands nungertemi senzüsenbongtsü atema bicycle kanga amshir.
Yashi, Rutt-i Modi pelashishia agizüker ta metetdaktsüdang, Hindi aser Dutch oshitem agi Twitter nung lemsatepa liasü.
Indo-Dutch diplomatic tesentaktep tenzüker küm 70 ajungba küm nung, ni Prime Minister Modi den ajuruteptsü kanga yongyar, ta Rutt-i metetdakja liasü.
Modi-i Portugal, US aser Netherlands linüktem semdangba sülen Bodbarnep New Delhi tonga aruogo.