Muslim linük 6 asoshi US-i temzüng yanglushir

Washington, June 29 (Agencies): Donald Trump US tir akümba sülen Muslim nunger linük trok nungi nüburtem US-i arutsü nokdangba temzüng yanglua aliba tera yanglushiogo. Iba temzüng tasenba ajanga item Muslim linük trok nungi nüburtem aser refugee tem US-i arutsü asoshi visa yanglutsü atema anasatepa aliba kinunger aser US den shishilembaba nung tesendaktep tajung aliba nisung nüngdaktsü.
Trump indang executive order ajanga Muslim linük trok nungi US-i arutsü tenokdangba agüja aliba ozüng Supreme Court ajanga agientsüba sülen iba temzüng tesenba ya yanglu.
Item Muslim linük trok nungi US-i arutsü asoshi visa yangluba mapang par tsürabur, adianu, tanur, tanur indang kinungtsü mesüra kinüngbu US nung telidak alir indang kuli tejangja agitsü.
Tetsü-tebu, semchi-semnur, tetong-techi, aunts, uncles, nephew, nieces, cousins, brother-in-law aser sister-in-law amala agi sendaktepa aliba indang kuli bo Muslim linük trok nungi US-i arutsü atema visa yangluba mapang memeshitsü.
Trump indang ‘travel ban’ tasenba nungi jenbua alitsü asoshi item linük trok nungi nüburtemi Homeland Security, Justice aser State nung ketdangser ajanga visa yanglutsü akok, ta ashir.
US nung aliba court aikati iba tenokdangba ya agizüka liaka linük nung court tulubai iba totuyuba tasenba ya US embassy aser consulate tem nem Bodhbarnü nikongdang agütsü.
Iba temzüng ya amshia aotsü asoshi sorkar indang lawyer mapa lir.
Supreme Court indang telemtetba ya national security koktetba lir, ta Trump-i ashir.
Muslim linük trok nungi US-i arutsü nokdangba linüktem ya Syria, Sudan, Iran, Somalia, Libya aser Yemen lir.
Supreme Court ajanga ashiba agi, United States nung tashi aser temeden aliba nüburtem den tejangja tesendaktep malirtem iba linüki aittsü memelar.
US nung aliba university nung azüngtsü mela aliba kaketshirtem mesüra US nung mapa inyaktsü asoshi jaoka aliba nisungtem par linüki otettsü, saka item kuli amshia US-i aotsü memelatsü, ta court-i ashi.
Iba sentong tasenba ya Brehostibar nungi tenzüktsü, ta osang ajanga ashi.
Executive order nung aliba ama iba tenokdangba ya linük trok asoshi anogo 90 aser refugee tem asoshi anogo 120 alitsü.