Indian Army-i taoba putiotsü nungi angazüktsüla: China

New Delhi/Beijing, June 29 (Agencies): India-i taoba mapang tatalokba (1962 küm rara) nungi tangazükba agitsüla, ta shia Brihostibarnü China-i India dang, arrtsü ken o tajungtiba agi latettsü atema Sikkim sector kübok Donglong tesem nung aliba sepaitem agienang, ta metetdaktsü.
China foreign ministry otongdar, Lu Kang-i India army tem Donglong tesemi aitba noksa ka lemsatepba den külemi, arrtsü mangatettep ken o tajungtiba agi latettsü asoshi iba tesem nungjagi India sepaitem agientsüla, ta ashi.
Paisa, “Onoki India dang tangsa par tsütsüleni sepaitem meyipa anir aotsü metetdaktsür. Ken o latettsü atema mezüngyongi ibaji bangjema lir,” ta ashi.
Ano külen China Defence otongdar, Col Wu Qian-ia, Bhutan linüki PLA sepaitemi Donglong tesem nung par litsü ozüng alema inyaker ta aitsübaji tai, kechiyong ozü sepaitemi China litsü nungi dang inyaker, ta ashi.
People’s Liberation Army otongdar-i, “Onoki India dang parnoki tai inyakbaji metongshiang ta shiogo aser China litsü nungi par sepaitem agienang ta shiogo,” ta metetdaktsü.
Yashi Bhutan-i China dang, Doklam kübok Zomplri tesem nung Army camp aliba tsütsülen China-i gari lenmang yangluba ashishia, item mapaji tangsa anenang, ta metetdakja liasü.
Donglong (Doklam) ya Chumbi Valley anasa lenmang asem ajurutepba tesem ka lir. Iba ya China kübok lir, ajisüaka Bhutan-ibo iba tesemji par meyong ta ashir.