Arishi küm 12 tetsür chanu ka tashi yim agi raksatsü

Tura, June 29 (Agencies): Linük nung ozüng takanga ka mali ta sayua ken o ka nung arishi küm 12 tetsür chanu ka arishi küm 39 tain tebur kati tashiyim agi raksatsüogo. Iba nisungba ya taoba mapang nunga iba kasa ken o nung aibelena jail-i yok, saka pa bail nung jail nungi jioker liasü.
Abelena alisang ya Sengsang T Sangma (39 East Garo Hills, Williamnagar nungi) ta jangjaogo. Pai arishi küm 12 tetsur chanu kaketshir ka Tura anasa Agalangre yimtsüng nung tashiyim agi raksatsü. Tanutsüla ya lar kinunger kidang lia liasü. Mezüngbo iba osang ya meimbanga ayutsü merang saka police aser child protection ketdangsertemi mapang shidak nung teka ia inyakba ajanga iba ken o temai adoka ken o ka benok saka iba mapang tashi nungbo aibelena alisang ya jena oadoker liasü.
Iba tatalokba ya June 23 nü atalok saka anogo ka lir kelenang temai adok.
Tanutsülai ashiba agi, Sengsang-i la anogo tepiyong nok ka rangshia amokmerena liasü. Nikongtsütsü 6 ako shi nung pai la arem kati anir ao aser indakji la den tashiyim agi shi nung medem. Pai maneni iba osang prokshira la tepsettsü, ta amokmeren. Iba tatalokba ya laer kinungertem kidang maliba tsüngda atalok.
Laisa ashiba agi, lai iba tatalokba kinungertem dang ashi saka parnoki iba tatalokba shinga dang mashitsü asoshi la nungtema ayu. Iba sülen lai police danga teyazü jembia liasü.Ajisüaka kidangertemi iba tatalokba jangjaa liasü aser child protection ketdangsertem lar ki semdangba mapang kidangertemi iba tatalokba metetdaktsü aser iba sülen ken o temai adok.
Iba sülen lar kinungertemi Tura Woman’s PS nung ken o ka benok. Ajisüaka police-i bushisüngdanga aoba mapang nungbo abelena alisang ya jena oadoker liasü.
“Onoki iba ken o angazükba sülen abelena alisang aputsü asoshi aiben merangogo saka pa dang tashi monguteti lir. Onoki maneni pa bushidar,” ta WGH, SP, Dr MGR Kumar-i ashi.
Police temi maneni Sengsang ya iba kasa ken o nung aibelena lir ta angazüka pa anema taoba mapang nung ken o benoka aliba tem bushidangdar.