Taoba Garo Hills MDC Assam nung puer ao

Tura, June 29(Agencies): Taoba mapang Garo Hills Autonomous District Council MDC Cary Marak mejangjaba telok kati pa state yimtiba Shillong-i yakaonung meyipa aruba mapang puer ao, ta osang tejangja ka ajanga metetdaktsü.
Iba osang ajanga ajak aoksateper aser Assam o Meghalaya police na senteper pa puer aoertem bushisüngdangdar.
Ozüng alema rakzükraktemertemi taoba MDC melena sen lakh 4 meshia liasü aser tatsüka lir iba jenjangji lakh ka aküm, par kinunger nungi osang ka ajanga ashiba agi, pa taküm anem chiokdaktsütsü mechi nung sen 70,000 bo agütsüadokogo.
North Garo Hills SP, Dalton Marak-i ashiba agi, parnok nem Cary puer aoba osang agütsüogo aser parnoki pa Assam kübok Bongaigaon tesem anasa samaba dang jangjaa lir. Tang tashi nung pa puer mao tsüngda kechi atalokar mejangjai lir.
Maraki par kinungertem dang pa Assam nung puer aoba aser puer aoertemi sen meshiba osang agüja liasü. Pa puer mao tsüngda pai par kinungertem dang pa Bongaigaon-i nüngdak atema odar ta metetdakja liasü.
Marak ya National People’s Party lenir ka lir aser pai West Garo Hills kübok Asanang nungi MDC election nung shilem agia koka liasü, ajisüaka pa 2015 Balachanda constituency nungi NPP ticket bener MDC election toktepba nung tamakok angu. Pa maneni Phulbari nungi MLA election nunga shilem agi saka tamakok angu.