Kiphere nung Drug Abuse anogomung amung

Dimapur, June 29 (Agencies): International Day of Drug Abuse and Illicit Trafficking sentong ka “Listen first- Listening to children and youth is the first to help them grow healthy and safe” omen nung ajemdaker DC Conference Hall, Kiphire nung June 26, 2017 nung mongogo.
Sentong nung ojembidang DC, Kiphire, Sedevikho Khro-i tsürapurtem dang tanurtem asoshi parnok nükrangdong ka küma pei chirnurtem temesepba mozü achiba aser illicit trafficking nungi kümzüka ayutsü asoshi ajungshi. Pai maneni sentepa aliba lokti dang tanurtem health aser parnok kümzüka ayutsü asoshi takok tashi inyaktsü asoshi ajungshi.
Medical Officer, District Hospital, Dr. Kevi-i temesepba mozü amshiba indang onük nung ojembidang ashiba agi, district nung nüburtem timba kati chemical substance tem; yi, ganja aser sulfadoxine pyrimethamine (SP) amala amshir. Iba amala mozütem tali amshiba ajanga tekolok aser temesen raksatsür aser overdose-a asür. Pai maneni ‘drug addict’ tem nem angati agi mozü agütsütsü asoshi District Hospital-i OSD centre ka lapoka lir, ta metetdaktsü.
‘Illicit trafficking’ onük nung jembidang SDPO, Kiphire, Khuza Jurry-i ashiba agi, ozüng-i shibelentsüba nokdanga aliba osettem timba ka meimlaba nisungtemi inyaker ta sasaseta ashi. Pai iba amala keno adokba mapang osang agütsütsü asoshi ajungshi.
Sentong nung lokti palaa agizükba o SDO, Longtiba L. Sangtam-i jembi aser SDO , James T. Khulu Tikhir-i tepela o jembi. Iba sentong nung District Administration nung ketdangsertem, Police officer tem, Medical officer tem, kaketshir lokti balala nungi lenirtem, NGO tem aser ward 11 nungi Chairman ajak arua aden.