ABAM toklang tenzükertem arangshi

Impur, June 29 (TYO) : Ao Baptist Arogo Mungdang (ABAM) kübok Arogo balala nung toklang tenzükertem nem lenisüba inyakyim nung tashi itdaktsütsü asoshi tesayuba agütsüba sentong ka tan June 20 nungi tenzüka June 29 tashi Impur nung takok ngua agiogo.
Tanü college aser university balala nungi tangazükba jenti bener arua Arogo nung amuoka inyakdang terata aser tetsükdak melii inyaktsü atema asen lima Arogo aser lokti inyakyim angazüktsü nüngdak ta apiteta iba ama sentong ya ABAM-i 2016 küm nungi tenzüka agir, aser tan agiba ya tanabuba sentong liasü. Taküm iba sentong nung Arogo 23 nungi toklang tenzüker 27 tashi dena liasü.
Iba sentong nung adenertem den tesayurtemi Tsüngrem tenzükba wadang balala nung inyakdang ajangshiba nungi tesayubatem aser ABAM kübok asünungji ABAM nükjidong aser lenisüba meteta inyaktsü asoshi shisalemsatepa liasü. Iba sentong nung adenertem ya Impur nung dang masü saka temeket Arogo balala nung oagi shilem agia tendakja liasü.
Tatembang sentong nung ABAM Executive Secretary, Rev.Dr.Mar Atsongchanger-i tenzükertem dang Khrista dak azüiter mapang ajak nung ajemalua Kibuba tenzüktsü asoshi ayongzük. Paisa tenzüker shia dang pei taküm nung Khrista akaba tejangja metetdakja nübortem Tsüngrem O agi mesütsü asoshi ajungshia liasü.
Iba sentong nung shisalen sayurtem aser shilem agirtem ajak dang kanga pelar ta ABAM Executive Secretary-isa metetdaktsü.