Nagaland nung 11 buba National Statistics Day mungogo

Kohima, June 29 (TYO): Brihostibarnü Secretariat Conference Hall, Kohima nung linük den külemi state nunga 11buba National Statistics Day anogomung mungogo; iba sentong nung tongti tesemdangerji Economics & Statistics Parliamentary Secretary, Tovihoto Ayemi aser tongti onük jembirji Chief Secretary, Pankaj Kumar liasü.
Iba anogomung nüngtem nung Ayemi-i Sixth Economic Census Report kaket sayaja liasü.
Tongti tesemdanger o jembidang Ayemi-i, iba anogomung nükjidong ya nüburtem dang, talisa lanurtem dang loktiliba-rongsenkettsüng asalentong aser linük yangerba asalentong nung statistics ajanga agiba shilem angatetdaktsütsü atema lir, ta metetdaktsü.
Paisa, official data indang tongtibang ‘source’ ji ketdangsüba osangtem lir, aser nüburtem atema social welfare balala inyaktsü asoshi sorkar atema ibaji kanga nüngdak, ta metetdaktsü.
Ayemi-isa, democratic lokti ka indang information system nung official statistics ji kanga nüngdak, koba ajanga sorkar, rongsenkettsüng aser nüburtem tenzüker, ta metetdaktsü.
Official osangtem atema kanga nendaka inyaktsüla aser itemji junga rizünga ayutsü nüngdak, ta shia pai department ajak dang mapang shitak nung peipei ketdangsüba osang tajungtiba agi update asütsü ajungshi.
Iba anogomung omen nung jembidang Chief Secretary, Pankaj Kumar-i, iba anogomung ya, asen taküm nung asalentong aser terenlok atema statistics ya koda tongtibang, ibaji meyipa reprangshitsü asoshi lir, ta metetdaktsü.
Ketdangsüba statistics dak sendakba nung pai, item osangtsüsang yabo ketdangsübaren atema dang bendener, ta ashi.
Ajisüaka tesasaba olen ka nung pai, küm aika terenlok liaka state nung ketdangsüba statistics tajungba akumtsü nüngdaker, ta ashi.
Iba dak sendakba nung pai, department ajaki peipei ketdangsüba osang tajungtiba nung update asütsüla; data tajungba akumba ajanga sentongtem tajungba akumba dang masü saka asalentong balala atema tajemdakdak tajung alitsü, ta ashi.
Iba sentong ya Secretary Kevileno Angami leniba nung agi aser Economics & Statistics Director, Y. Sacheo Ovung-i tepela anküp o jembia liasü.