Samsung-i Apple iPhone 8 atema alima nung OLED Plant tulutiba yanglutsü

July 1, 2017 (Agencies): Taruba Apple iPhone 8 aser tanga device tem atema flexible OLED screen tem yanglutsü atema Samsung puri South Korea nung alima nung OLED plant tulutiba yanglutsü asoshi sentong lir. Samsung display small aser medium flexible OLED screens tem ya alima nung display shishilembadak shilem 98 bo parnok meyong lir. Osang ka janga ashiba agi, iba plant ya Cheonin aser Asan nung sen billion $1.75 indoka yanglutsü aser OLED fabrication equipment atema billion $ 14 indoktsü. Plant ana yangluba nung sen billion $21 shi indoktsü imlar. “Samsung Display-i alima nung OLED plant tulutiba yanglutsü asoshi sentong lir aser iba ajanga tanga Samsung Display’s plant tulutiba A3′ dang nung yanglutetba dang nungi shilem 30 agi timba yanglutettsü,” ta iba osang ajanga Honibarnü metetdaktsü.
Samsung Display-i ‘A5’ ta nüngja agütsür sixth generation flexible OLED production line yanglu tenzükogo aser iba ajanga ita nung 180,000 nungi 270,000 panels yanglutettsü tashi lir. Samsung Display-i plant ana nung 270,000 panel yanglutettsü tashi keta yanglutsü asoshi sentong lir. “Plant anaprongla nung ita shia 135,000 panel yanglutettsü. Parnoki iba sentong atalokdaktsünera sen billion $20.1 nungi 21.0 tashi indoktsüsa akümtsü,” ta kasa osang ajanga ashi. Apple company ajanga OLED tem aika order asüba sülen Samsung Display puri parnok indang ‘A3’ plant 2015 küm atsülang tenzüka liasü.
Apple’s iPhone 8 nung 5.8-inch edge-to-edge OLED panel den 5.1-inch practical area ka keta alitsü imlar. Tanga feature tem rongnung 3D facial scanner dena alitsü imlar. “Samsung Display ajanga display yangluba timba kümdaktsütetra parnoki jenjang tajemba kümdaktsütettsü,” ta osang ajangasa maneni metetdaktsü.