Tamil Nadu Theater tem July 3 nungi shibangtsü

Chennai, July 1 (Agencies): GST amenokba sülen saru agütsütsüba yimya nung osang tejangja ka maliba ajanga Tamil Nadu Film Chamber of Commerce ajanga hokolbarnü July asem nü nungi tenzüka mapang telatet ka makai Tamil Nadu ajunga nung film sayuba tesemtem shibangtsü, ta metetdaktsüogo
Goods and Services Tax (GST) ya Honibarnü nungi mapa küma inyak tenzükogo.
“State sorkari hopta tsüngda nung theatre kiburtem dang parnoki saru kwi agütsütsü nüngdaker iba osang tejangja agütsütsüla. Hombarnü nungi tenzüka state ajunga nung film sayuba tesemtem shibangtsü,” ta Tamil Nadu Film Chamber of Commerce, tir Abirami Ramanathan-i osangbenertem dang ashi.
Yimti nung film sayuba tesemtem ticket mekaa ayuba maparen metenzüki lir kechiyong sorkari entertainment saru kwi sarutsüar mejangjai lir.
“GST ma nung entertainment saru agütsütsüsa kümra sorkar nem onoki ticket rate shilem 53 saru ama agütsütsüsa akümtsü. Iba ya onok asoshi tetsükdaktsü tulu asütsü kechiyong iba ajanga iba industry nung sendaka aliba kibong lakh 10 dak tema dak kongshitsü,” ta paisa ashi.
Sorkari cinema tickets sen 100 dak tema nungibo GST rate shilem 28 asütsüba sangdongogo.