GST inyakyim nung timtem ajak ita ana nung bentetadoktsü: CEA

New Delhi, July 01 (Agencies): Chief Economic Adviser (CEA), Arvind Subramanian-i, GST mapa küma benokba sülen iba dak sendakba timtem balala ita ana tsüngda nungbosa bentetadoktsü imlar, ta metetdaktsü.
Yasüng ayaterm nung Parliament nung GST tenzükba sentong tembangba sülen osangbenertem den jembidang Subraamanian-i, “Tamasabo timtem kar ajurutsü. Ajisüaka ibaji 1-2 tsüngda nungbo bentetadoktsü,” ta ashi.
Yasüng iba sentong nung jembidang linük Tir, Pranab Mukherjee-i, GST inyakyim nung timtem karbosa adoktsü, ajisüaka ibaji ajanga rongsenkettsüng ainba mekongshitsü atema tekaraba nung item timtemji bentetadoktsüla, ta ashi.
Central Vigilance Commissioner, K V Chowdary-ia, “Tamasabo timtem kar adoktsü, ajisüaka Centre aser state temi ibaji bentetadoktsü,” ta ashi.
Paisa, GST ya tongtibang mera ka lir, aser iba ya ajanga black-market nokdangtsü aser shishilembabaren tezüpaba akumtsü, ta ashi.
GST ajanga osettsüset kar nung jenjang tali atutsü asü, ta asüngdangba langzüdang pai, “Ibaji shidak masü, iba ya revenue-neutral GST ka asütsü ta sorkari shiogo. Sorkari saru tali maazüktsü,” ta ashi.
GST ajanga rongsenkettsüng aintsü asü, ta asüngdangba langzüdang BJP lenir aser taoba Union Finance Minister, Yashwant Sinha-i, “Asenoki repranga atadi. Tang-tangbo ibaji tetzütsü tasak,” ta ashi.
AIADMK züngsem, Navaneethakrishnan-i, “Iba ya mera shidak ka agiogo. GST ajanga talirtem aser shishilembartem naprong tajangzük angutsü. Osettsüset nung jenjang matutsü. Iba ozüng tasenba atema Tamil Nadu junga renema lir,” ta metetdaktsü.