Imtilemba-i Nagaland nung cooperative maparen tashi itshitsü ayongzüker

Kohima, July 7 (TYO) : Nagaland nung cooperative inyakyim asentenshitsüla aser tashi itdaktsütsüla ta Cooperation Department atema Chief Minister Adviser aser MLA, Imtilemba Sangtam-i ashi.
Kohima nung Registrar of Cooperative Societies office nung cooperation department pur orientation & interactive senden nung Imtilemba-i ketdangsertem dang department akangshitsü aser nübortem taküm jenjang tajungba kümdaktsütsü atema sentongtem inyaka aotsü ayongzük.
Bendanger linük aika nung cooperative system tashi aitba ajanga linük renlokdaktsür aser linük aika nung rongsen aika cooperative societies meyong lir, ta paisa ashi.
Nagaland nung cooperative units atema temulung magütsüba angudang kanga sasa bilemer. Naga nungertemi aluyimba tsütsü mapa takok ngua inyaktettsü kechiyong asen state nung temo aketba ali lir, ta Imtilemba-isa shisem.
Paisa Nagaland nung MARCOFED Ltd aser WEAFED Ltd nungertem yanglushir tenzükshitsü aser kasa mapang nung tanga department nem agüja aliba mapa kar meyipa meshir cooperation department-i acha ayanga inyaktsüla.
Sorkari cooperation department nem senotsü peria lemzüktsütsüla, aji asü nungdang department-i nübortem asoshi mapa inyaktettsü, ta Imtilemba Sangtam-isa shisem.
Tanü senden nung Velasa Nakro, registrar Cooperative Societies, Nagaland-i tesentepertem pelaa agizük aser S.N.Tsanglao, joint secretary Government of Nagaland-ia o tatsüka jembi.
Senden nungsa NSCB Ltd, MARCOFED Ltd aser WEAFED Ltd nungertemi inyakba osangtem benoka olemtep.