Jt. Director IPR-i DPRO office Mkg semdang

Mokokchung, July 01 (TYO): June 30, 2017 nü Jt. Director IPR, Nagaland, Tokishe-i DPRO Office Mokokchung semdanga liasü; iba mapang nung pai office inyakyim aser official mapa tajungba inyaktsü atema office-i nüngdakbatem reprangdanga liasü, ta ketdangsertem osang ka ajanga metetdaktsü.
Ketdangsertem aser staff tem den shisa lemsatepdang Tokishe-i, department-i nüburtem tajungba tenzüktettsü atema sorkari nüngdakba infrastructure aser equipments osettem agütsütsü atema meranga inyaker, ta metetdaktsü.
Linük ka terenlok aser yangerba nung osangtsüsang ya tongtibang hadir ka lir, ta shia Tokishe-i, IPR department-i sorkar mapatongtem aser sentongtem metetdaktsüba ajanga nüburtem aser sorkar tsüngda tiyongtsüi ia tongtibang shilem agir, ta metetdaktsü.
Pai DPRO office Mokokchung nung infrastructure aser inyakyim agi melungsüa liasü.
Jt. Director, Tokishe-isa IPR department ajungkettsü atema IPR office ajaki pei tajungtiba agi inyaktsüla, ta ayongzüka liasü.