Khasi tsür mezüngmeshiba atema lungkak ait

Shillong, July 1 (TYO): Taoba Deobarnü Delhi Golf Club nung Khasi tsür kati ‘jainsem’ ta ser Khasi nunger sobaliba sübotsü agiba atema mezüngmeshiba anema Meghalaya aser Northeast kübok tesem balala nung lungkak aitba sentongtem agiyonga arudar.
Honibarnü Meghalaya Pradesh Mohila Congress Committee-i Shillong nung iba onük atema lungkak aitba sentong ka ayongzüka agi.
Khasi tsür Tailin Lyngdoh mezüngmeshiba atema Delhi Golf Club ketdangsertemi la dang tatok meshitsüla ta MPMCC-i takhangba agüja, state Congress Bhawan nungi tenzüker Additional Secretariat Parking Lot tashi lungkak aitba sentongji agi.
“Iba tatalokba ajanga Meghalaya dang masü saka Northeast nungertem temulung yirutsüogo. India ya sobaliba aser nisung temeyoktep aliba linük ka ta Delhi Golf Club ketdangsertemi angatettsüla. State shia nung nisungtem sobaliba maitsü balala lir” ta MPCC secretary, Szarita Laitphlang-i ashi.
“Delhi Golf Club-i mezüngmeshiba Khasi tsürla dang tatok meshitsüla. Lai international conference aika nung jainsem sübor India tenüng nung shilem agiogo saka shingaia la mezüngmeshi masü” ta Szarita-isa shisem.
Tanü agiba sentong nung Chokpot LAC MLA, Bluebell Sangma-ia Tailin Lyngdoh pusema o jembi.