BJP puri CPI-M anema longkak ait

Agartala, July 2 (Agencies): Taoba hopta ishika tsüngda nung BJP nung mapa inyakertem amakba anema aser union home ministry dang state nung temzüng ozüng shidak mamshiba atema parnoki teyongtsüi aita inyaktsü asoshi takhangba agüja BJP puri longkak aitba sentong ka aka.
BJP lenirtemi ashiba agi, state nung Chief Minister Manik Sarkar aser CPI-M state secretary Bijan Dhar nati ajungmesoba sülen joko anogo ishika CPI-M puri parnok züngsemtem mazüokteti kümogo. Tena pronglai züngsemtem dang pei kümzüktsü mechi nung ta shia parnok züngsemtem dang opposition pur amaktsü asoshi tetuyuba agütsü.
Maneni CBI puri Left Front minister tem dang tasüngdangba balala asüngdang tenzükba sülen CPI-M puri opposition den tokteptsü asoshi tashiyim agi inyak nung dang ajungtsü ta angateta aruogo. Parnoki ano CBI puri minister aser MLA tem aika dang Non Banking Financial Companies scams dak sendakba nung ken o balala ashishitsü ta meteta lir.
BJP vice-president Subal Bhowmik-i ashiba agi, Centre nung BJP lenirtemi aser Union Home Ministry ajanga state nung Disturbed Areas Act benoktsüba atema takhangba süoki ia agizükogo. “Centre-i onok takhangba agizüka nüburtem CPI-M pur ket nungi kümzüktsü ta imlar. Iba takhangba ya kanga tapet kümogo kechiyong state nung police tem yimsüsüba party atema dang inyaker aser opposition pur merenshir,” ta Bhowmik-i ashi.