Khristan state tem lenji arua GST Council senden anogo melenshi

Shillong, July 2 (Agencies): GST Council-i ‘tax reforms meeting’ itashia mezüng Deobar nung masü saka Honibarnü ang amentsü mulunga agizükogo.
Meghalaya sorkari GST Council dang, Khristantem teimba sür aliba state nung Deobarnü senden amentsü nung tetsükdaktsü ajurutsü, ta shia anogo melenshitsü atema ayongzük.
“Mapang shia Deobarnü GST council senden amentsü jatep aser GST tenzükba sülen, itashia mezüngbuba Deobar nung council senden amentsü tebilemba benok” ta Meghalaya Taxation Minister, Zenith Sangma-i ashi.
“Ajisüaka, Meghalaya-i iba tebilembaji magizük. Mizoram aser Nagaland ama Meghalaya ya Khristantem teimba sür aliba state ka lir aser ibaji akhümtsübula ta ni ashi. Linük indang secular tangatetba kümzüka ayutsüla aser Deobarnü senden agitsü anema nokdakba ajanga GST Council-i mezüng Honibar nungang senden agitsü mulunga agizükogo” ta Zenith-isa metetdaktsü.
NDA sorkari inyakyim alema Hokolbar ayaterm nung GST tenzükba sentong agiba anema Congress lennirtemi Delhi nung lungkak aitba sentong ka agi. July 1, 2017 anepdang 12:00 ako nungi India nung Goods and Services Tax (GST) inyakyim tenzük.
Sentong nung India Tirbo adentsü jaok saka Prime Minister-i ang GST tenzüktsübaji, sorkar inyakyim alema inyakba ka dang masü saka linük mezüngmeshiba ka lir. Iba jagi onoki (Congress) iba sentong nung madentsü lemtet, ta Zenith-isa osangbener dang ashi.
GST tenzükba sentong yamatu tulu ayongzüka magitsüla kechiyong tesüiba mapangtem nunga tongtipang sentongtem ayongzüka agidang, kanga benjungbentsüa magi. Aluyimertem tekangshi ajurua aliba mapang ka aser shishilembartem anema nokdakba mapang benjung amungbaji tim masü, ta paisa ashi.
Shillong nung GST Commissionerate-i mezüngbuba GST Day ji Honibarnü amung. North East ajunga atema Central Processing Centre ji Shillong nung amenoka lir.
Sentong nung GST Commissioner Bandhana Deori-ia ashiba agi, GST tenzüker anogo isikabo internet connectivity aser registration atema timtem ajurutsü saka kobi melii GST tiptema inyaka otettsü.
“State, the Centre aser sendaktepa alirtem yaritepa GST ya tajangzüka aliba maparen ya südaktsütsüla” ta paisa shisem.