Wimbledon 2017: Murray, Nishikori aser Venus nunger tanabuba round-i iogo

London, July 03 (Agencies): Taoba küm teburtem Wimbledon tennis kija asaya koka alisang, Andy Murray-i Hombarnü kasa asayamong nung takok ngua tanabuba round-i iogo.
Hombarnü tsünglu agi asaya anaben tashi anendakja asayaba nung World No. 1, Murray-i Kazakhstan nunger Alexander Bublik madak 6-1, 6-4, 6-2 agi takok angu.
“Bublik ya asayar tajung ka lir. Pai yimya balaka nung asayar aser pa asayaba ngua tereprangertem jangratemogo,” ta Murray-i ashi.
Murray-i tanabuba round nung German nunger Dustin Brown den asayatsü.
World No. 97, Brown-i Portugal nunger Joao Sousa madak 3-6, 7-6 (7/5), 6-4, 6-4 agi takok angu.
Kasa asayamong nung tetsürtem kija asaya nung Venus Williams-i Elisa Mertens madak 7-6 (9/7), 6-4 agi takok angu. Ponguben tashi iba asayamong koka alila, Venus ya tawa gari tsüktepba lendong nung densema liaka lai asaya nung temolung agüja asayatet.
Taoba ita Florida nung Williams indang gari agi tanga gari ka dak atsükba ajanga iba gari nung mena alir nisung ka asüba agi la anema ken o benoka lir.
Arishi küm 37 tain, Venus Williams ya Wimbledon asayamong nung 20 ben buba asayar aser la iba asayamong nung 1997 küm mezüng asayadang lai tanü akokla, Mertens ya arishi küm ka tain liasü.
Jenjang 54buba nung alila Mertens ya Grand Slam asaya tanü asayaba densema pongububa asayar liasü aser Williams ya Grand Slam takok tenetben tashi nguteta lir.
Hombarnü kasa asayamong nung Japan nunger Kei Nishikori-i Italy nunger Marco Cecchinato madak 6-2, 6-2, 6-0 agi takok nguteta tanabuba round-i iogo.