Court-i Mulayam Yadav jaoker

Mahoba (UP), August 21 (Agencies): Tawa Samajwadi Party tongti lenir Mulayam Singh Yadav-i tashiyim amshia raksatsüba oren ka jembiba dak sentakba nung local court kati pa September 16 nü jaokogo.

August 18 nü Lucknow nung Yadav-i, tashiyim amshia nisung kati dang raksatsür, mangyangtsü atema nisung pezü tenüng agütsür aser nisung pezüi tashiyim amshia raksatsübajibo mezüngshitsüla, ta jembiba oji Kulpahad Tehsil nung Civil judge (junior division), Ankit Goel-i ashishiogo.

SP tongti Yadav-i, mapang kaka nungbo, nisung kati dang tashiyim amshia raksatsü ser nung mangyangtsü atema nisung pezü tenüng agütsüba tatalokba lir, ta jembia liasü.

Iba dak sentakba nung Indecent Representation of Women (Prohibition) Act, 1956 kük section 3 aser 4 iba den IPC sections 504, section 505, 509 aser section 116 tem nung ajemdaker pa okadaki jaokogo.