Meira Kumar-i WB nung aser Ram Nath Kovind-i Telangana & AP nung nübo ayimer

Kolkata/Hyderabad, July 4 (Agencies): Congress-i aniba opposition pur Presidential candidate Meira Kumar-i Mongulbarnü West Bengal nungi Trinamool Congress, Left aser Congress party MP aser MLA tem dang teyari meshi.
“Nenoki ni yarir ta kü dang shiogo. Nenoki kü nem tashi agütsür. Kolkata aser West Bengal ajanga kü nem tashi agütsür aser ajungmesor, kechiyong iba tesem ya rarartem adokdak lir. Nenoki ochimashi aser bendanga amshiba anema teti rarayonga arur” ta Meria Kumar-i West Bengal assembly nung ashi.
“Tesüiba küm 8-9 tashi, India nung yimten yimsüsüba tsütsü temelenshi adokba asenoki nguogo. Opposition party tem külemi longjem. Tangatetba balala ajanga meputepba teloktem ka küma longjem” ta laisa ashi.
Ano külen, NDA presidential candidate Ram Nath Kovind-ia Mongulbar nungi Telangana aser Andhra Pradesh state tem semdangtsü tenzükogo.
Opposition-i shimba nübo Meira Kumar-i Hyderabad semdangba sülen anogo ka lir, Kovind-i tanü iba yimti semdang.
Bharatiya Janata Party (BJP), Telangana Rashtra Samithi (TRS), Telugu Desam Party (TDP) aser YSR Congress Party (YSRCP) lennirtemi Begumpet Airport nung pa pela agizük.
Kovind pelaa agizükertem rongnung Central Minister tem- M. Venkaiah Naidu, Bandaru Dattatreya, BJP Telangana unit tir K. Laxman, Telangana Deputy Chief Minister Mohammed Mehmood Ali, Minister tem N. Narasimha Reddy aser Harish Rao nungertem liasü.