TMC MP amokmerenba atema Mamata-i bushisüngdangtsü tuyu

Kolkata, July 4 (Agencies): Trinamool MP aser Netaji Subhash Chandra Bose’er semchir Sugata Bose amokmerenba “syndicate” züngsemtem anema bushisüngdang asütsü atema West Bengal Chief Minister Mamata Banerjee-i tetuyuba agütsüogo.
Chief Minister Mamata-i Commissioner of Police aser state DGP na dang state ajungalen syndicate züngsemtem anema ken o benoka alibatem bushisüngdang asütsü tetuyuba agütsü.
Hombarnü lanur telok ka Jadavpur MP Sugata’er kidangi aru aser idakji tetsü Krishna Bose amokmeren.
Kiji South Kolkata kübok 90 Sarat Bose Road nung lir aser lanurtem jagi Krishna Bose dang police-ia parnok dang kecha meshitettsü ta shia amokmeren.
Iba mapang Sugata kidang liasü aser pai Trinamool MP Subrata Bakshi dang phone ajanga tatalokba osang lemsatep. Iba osangji Chief Minister’s Office atong aser iba sülen Mamata-i tetuyubaji agütsü.
“Syndicate züngsemtemi Krishna Bose amokmeren aser la dang lar kidang mapa inyaktsü atema osettsüsettem malitsü atema ashi. Iba dak sendakba nung nisung 6 tashi pua lir” ta police ketdangser kati osangbener dang ashi.
West Bengal nung opposition CPI (M)-ia iba mapa inyakertem ozüng tapet agi merenshitsü atema takhangba agütsü.
“Ozüng alema inyaksangshirtemi MP ka dak yamai inyaktetra, Bengal nung real estate company tem koma timtem ajuruya alitsü?” ta CPI-M MP Md Salim-i ashi.
“Ozüng alema inyakba mapatem anendaktsütsüla. Asenoki Bengal ya alima map nung dendaktsünüra, sorkari mapa akangakanga inyaktsüla” ta paisa shisem.
Ano, State BJP General Secretary Sayantan Basu-ia “Bengal nung iba onük azüoktsü atema ozüng tesashi yanglutsüla. Sorkari mapa inyaktsüla” ta metetdaktsü.