Hanoi yimtong nung 2030 tashi nungbo motorcycle senzüsenpongba nokdangtsü

July 4, 2017 (Agencies): Vietnam yimtiba Hanoi nung traffic jams aser pollution tajemba kümdaktsütsü nükjidong nung 2030 tashi nungbo yimti nung motorcycle mesenzüdaktsütsü asoshi Mongolbarnü telemtetba agiba city’s People Committee-i parnok indang website nung sangdonga liasü.
Ketdangsertemi Hanoi nung motorcycle tali akümba ajanga iba sentong ya yaküm asadanga liasü. Nütsüng renlokba den külemi middle class puri gari aika aliba ajanga yimti nung lenmang nung senzü majungtsü ta tsübuba ajanga iba sentong ya asadanga liasü.
Iba scheme kübok sorkari tanem tanemi yimti nung tesem kar nung motorcycle senzüba tajemba kümdaktsütsü, ta committee-i parnok website ajanga metetdaktsü.
Ajisüaka iba sentong takok angutsü mangutsüar memetet.
Motorcycle anirtemi ashiba agi, yimti nung public transport majungba den külemi nüburtem parnok intetba senzüsenbongba yimya nokdangtsüji tamakoktsü asütsü.
Aso taseni ayaoka aitba sülen Vietnam economic kanga keraa ainba ajanga kibongshia income pezüsü agi timba akümer. Nütsüng yongsük million 90 aliba nung nisung anashia ka ket nungbo motorcycle lir aser 2016 nungbo gari ayokba shilem 30 agi tali kümogo.
Yimti sorkar ajanga ashiba agi, Honai yimti nung küm asem tashi nungbo motorcycle million trok akümtsü.