RBI senpak 200 note adoktsü

New Delhi, July 05 (Agencies): Tang India nung senpak denomination tila agi anüngba süngjemtsü atema Reserve Bank of India (RBI)-i senpak 200 tasen adoktsü; senpak 200 notes tasenbaji taküm küm tatemlensa adoktsü, aser ibaji ajanga nüburtemi nüngdaka aliba ataloktsü, ta osang ka ajanga metetdaktsü.
Kasa osang ajanga ashiba agi, tangtangbo senpak 1,000 notes adoktsü sentong mali.
Ajisüaka senpak 200 notes ji ATMs ajanga magütsütsü, saka senpak 10, senpak 20, aser senpak 50 ama bank branches ajanga dang agütsütsü.
Yaküm November ita nung Centre sorkari senpak 500 aser 1,000 notes anentsüba sülen senpak 500 notes aser senpak 2000 notes tasen adok, ajisüaka senpak 1000 notes madok.
Senpak 200 notes tasen atema kobi melii Reserve Bank of India-i osang ka metetdaktsütsü.
Kasa osang ajanga ashiba agi, sen 200 notes adokba ajanga linük nung sen notes tila agi anüngba timtem pungbatsü, iba den külemi senpak 2,000 notes ajanga timtem ajuruba pungbatsü.
Taküm March ita nung RBI-i Finance Ministry den iba onük atema jembiba sülen senpak 200 notes tasen adoktsü lemtet.