Laldenga sür küm 27 ajungba sentong agi

Aizawl, July 07 (Agencies): Mizo nunger lenir asür, Laldenga sür küm 27 ajungba anogomung Hokolbarnü Treasury Square nung ayonga agiogo.
Iba sentong nung adenertem rongnung Mizoram nung taoba Chief Minister Zoramthanga aser asür Laldenga kinungtsü Lalbiakdiki na liasü. Parnoki asür Laldenga indang leper nung naro yuja akhüm agütsü.
Laldenga ya July 11, 1927 nü Mizoram kübok Pukpui yimtsüng nung aso. 1944 nung pa British Indian Army nung aden aser Mizoram nung ‘Mautam’ ta ser ayawara arudang pai Mizo National Famine Front tenzük. 1950s mapang Mizoram nung aou nung tepen apungba sülen koya tali züinba ajanga ayawara timtem tulu ajurua liasü.
Laldenga-i October 22, 1961 nü MNFF nungi Mizo National Front (MNF) ta ser yimten teloki melen. India yimsüsüba nungi nüjiso meshitsü tangatetba nung pai iba mapa ya inyak.
June 30, 1986 nü Laldenga-i Mizo Peace Accord nung sign asü aser ibaji ajanga Mizoram nung yimjung bener aru aser pai mezüngbuba chief minister inyak.
New York nung pa cancer atema yaritepa aru aser 1990 küm London nung pa asü. Asür Laldenga nem Aizawl nung state funeral agütsü aser tanü tashi Mizoram nung state funeral agütsürji pa dang lir.