Dispur Hospital-i DPC züngsemtem asoshi teyari agütsür

August 21, 2015 nü Dimapur Press Club (DPC) pur Hepatitis-B vaccination camp tanabuba agiba sülen Press Point, Super Market, Dimapur kima nung agiba noksa angur.

Dimapur, August 21 (TYO) : Dimapur Press Club (DPC) züngsem mesüra kinünger kar temang manemi Dispur Hospital, Guwahati nung anepalutsüsa kümra, parnok anepaluba taa noklang nung shilem 20 ajemer agitsü, ta tanü Dispur Hospital ketdangseri metetdaktsü.
Hokolbarnü Press Point, Super Market, Dimapur nung Hepatitis-B vaccination camp shilem tanabuba agidang Dispur Hospital PRO, Ujjal Saikia-i iba osang metetdaktsü.
Iba camp ya Dimapur Press Club (DPC)-i Dispur Hospital den külemi yaritepa DPC züngsemtem atema angati ayongzüka agi.
Iba mapang DPC-i Dispur Hospital PRO dang noklang nung shilem 20 ajemer agitsüba maongkaji Kohima Press Club aser Mokokchung Press Club nema agütsü nung ajungtsü ta shidang aser ibaji pai Hospital ketdangsertem den jembitsü ta nangzük.
DPC pur mezüngbuba Hepatitis-B vaccination ji July 21, 2015 nü agi aser tanü tanabuba shilem takok ngua agiogo.
Dimapur district nung press züngsemtem asoshi DPC-i iba sentong ayongzük aser DPRO Dimapur staff tem dena media house balala nungi züngsemtemi Hepatitis-B vaccine agiogo.
Tanü agiba sentong nung DPC tir, Moa Longkumer-i Dispur Hospital dang Hepatitis-B vaccination camp agiba dang masü saka DPC züngsemtem dang nungi taa noklang nung shilem 20 ajemer agitsü maongka agütsüba atema pelaba metetdaktsü.
DPC tirisa ashiba agi, Dimapur nung pharmacy kari DPC identity card alirtem dang mozü jenjang nung 10% ajemer agitsü teyari agütsüba den ano taküm September ita diabetes camp ka alitsü osangtem metetdaktsü.
Sentong nungsa Tir Yimyim yimozülur, K. Temjen Jamir aser Guwahati Press Club tezülur, Nava Thakuria nati o jembi.