Xiaomi company India nung tanabuba jenjang nung lir

July 8, 2017 (Agencies): 2017 tanabuba quarter nung Xioami company-i smarthphone ayokba nung jenjang tasen ka tongtetogo. Osang ajang ashiba agi, China nunger smarthphone company yagi iba ita tetsüngda nung smarthphone million 23.16 yokogo koba taoba quater dang nungi shilem 70 agi timba lir. Company smartphone all-hands senden ka nung Xiaomi company ngutetsang aser CEO, Lei Jun-i company takok indang metetdaktsüba den külemi iba takok asoshi inyakba maparentem shisema liasü.
Lei Jun-i company-i maneni Research aser Development nung sen indokba aser parnok indang offline aser online retail store tem nung phone ayokba yimya asadanga melenshia inyakba ajanga parnok indang smartphone yanglua ayokba nung küm ishika tejakdang nungi tang kanga agi takok tajung anguba shia Xiaomi employees dangi shidi ka yok. Shidi nung pai company innovation aser technology tsütsü rangloker inyakba indang ashidang yaküm küm Xiaomi nem patents 2,895 agütsüba shisem aliasü. Xiaomi phone tem ayokba indang jembidang Lei Jun-i taküm China nung ‘618’ online shopping festival nung e-commerce websites asem tashi nung smarthphone ayokba nung jenjang temaba tongtetba metetdaktsü.
Xiaomi company India nung inyakyim indang jembidang pai shidi nung Indian smartphone shishilemba dak Xiaomi-i jenjang tanabuba tongtetba metetdaktsü. Maneni shidi nung Xiaomi revenue küm nungi küm tsüngda nung shilem 328 ajungketba den külemi India nung smarth phone tem rongnung Redmi Note 4 timtiba ayokba shisema liasü. Shidi tatemi pai taküm küm tatemi RMB Billion 100 adongtsü nükjidong aliba aser 2018 kümbo smarthphone million 100 ayoktsü asoshi sentong aliba lemsatep.